1997 – Hei d'Banke fusioniert
Si hei schiens – wird öis gseit – zweni guet rentiert
Au öisi Chäsi die lauft schlächt, het gli kei Chunde meh
Fusioniere mit der Metzg würde mir aus Lösig gseeh
Dr Friedli chönnti Chöschte spaare s'Gschäft würd meh rentiere
Und s'Fischers - jo - die würd me haut wegrationalisiere.
Z'Amerika do dreiht sich scho sit Wuche s'isch e Witz
Aues nur no ume Clinton und si Hoseschlitz
Bi öisne aute Bundesröt muesch gar kei Angscht me ha
Dene ihre Hoseschlitz längt bestimmt kei Frau me a.
Es nöis Garaschetor söu's bis Studeruse geh
Aus Maa vom Fach do wott die Sach dr Sohn i d'Finger neh
Chum isch das Werk vollendet stiegt der Dome stolz i Chahre
Verwütscht e fausche Gang und duet das Tor grad zämefahre.
Hüt wärde s'heisst zum Wohl vo öis Schof und Rinder gklont.
För öis isch klar das macht me au mit Mönsche wenn sich's lohnt.
Bim Ebner lohnt sich's hüt scho mit sine Stüürmillione
Für jede Kanton i dr Schwiiz chönnt me eine klone.
Nur dr Papscht isch gäge s'Klone öis wunderet's nid gross
Dä bringt jo scho ei einzige Haas fasch nümme los.
Im Ski-Weekend vom STV do goht me, das isch klar
Chum isch me uf em Titlis obe zerscht mou i ne Bar.
Ei Rundi folgt dr andere, gli hei si weichi Chnöi
Und z'obe göi si bsoffe mit der Gondle wieder hei.
Die zwöi do het me chürzlech schiens i dr Chäsi gseh
Büchse, Bier, Servelat und Öpfu vöre neh
Ganz verzwieflet seit dr Urs: "I lueg no bim Salat
Dass s'Waltraud unter Gstöu cha luege macht's fasch dr Spagat
Uf aune viere si si gschnooget, und hei ziemli gfluecht
Si hei drum wie vergiftet ihre Lotto Zettu gsuecht.
Im Blick do gseht me jede Tag, uf dr Siite vier
E supper Chatz drum hei mir jetz die Ziitig abonniert
Doch wo d'Nella Martinetti, blutt und mit em Fründ
I dr Ziitig cho isch hei mer s'Abo wieder gchündt.
Jedes Johr do zahle mir chli meh für d'Sackgebühr
Und au aute Schrott entsorge chunnt di ziemli düür
Drum het dr Dani Bär sis Velo heimlech deponiert,
Aber d'Nummere het är, dä clever Maa nid abmontiert
Zum Entsorge vo sim Velo zahlt är kei Gebühr
Derfür chunnt ihn das Bild vom Brack Fritz jetz chli düür.
"Wohnen wie in New York" das wird z'Chappu propagiert
Überlegget Öich was denn mit öisem chline Dorf passiert:
Dr Müller Walti das isch klar dä wär do no derfür
Är hät dr Start vom Marathon direkt vor siner Tür
Doch würd denn au me stöu sech vor dr Meili do hi cho
Und es Gsuech um Asyl bim Gmeinroot hinterlo.
Im Gmeinshuus unde würd me dr D'Amato ghöre flueche
Är chönnt denn quasi grad vor Ort nach Schwiizer Dräck go sueche
Dä Gedanke macht öis chrank, es schüttlet öis vor Fieber
Do isch öis jo sogar no öise nöi Amme lieber.
Hilfe, wo isch Polizei, me het mir s'Auto gnoh
Rüeft d'Jeanette Wyss am elfi z'Nacht – so hei mir's vernoh.
D'Polizei verfolgt dä Dieb bis zur Windrose ue
Dört hei si ihre Maa denn gschnappt, bsoffe wie ne Chue.
Öisi Schwiizer Chäsli Fahrer die si ziemli schlächt
Lits äch au am Sponsor frooge sich döu Lüt zu rächt.
Wöu d'Schwiizer Chäser schwarz döi chäse het me reagiert
Und s'nöchscht Johr grad aus nöie Sponsor d'Swissair engagiert.
S'nöie Dress macht öisi Fahrer sicher vöu vöu schnäller
Es het drum Flögu a de Arme und am Arsch no e Propeller.
Das muess es super-mega geils Feschtli geh
Hei mir dänkt wo mir das riese Zelt hei gseh
Dr Nötiger wott d'Iiweihig vo sim Gschäft celebriere
Doch z'Obe gsehsch ne ganz allei es Bierli degustiere.
Wär humplet do durs Dorf derab, aus hät är gar nüt z'tue
Zwee Schritt vorwärts eine zrugg öis dunkts dä sig chli zue
Damit är sich au offiziell cha vor em Putze drücke
Lauft dr Müller Walti scho sit Mönet a de Krücke.
