Mir mache öis chli Sorge und zwar wäg däm warme Klima
Doch d'Iris Giger gseht das nid so äng - si find das prima
Dr Früehlig cha ruehig cho, si duet scho lang druuf blange
Voruss döi nämlech bi ihr am Baum scho d'Ostereier hange.
Doch stopp! Wiit gfäut! Die Gschicht isch so nid woor
Die Ostereier hange dört no vom letschte Joor.
Mir si i d'Beiz es Bier go nää, voruss stoht e dunkli Gstalt
Im Muul e dicke Stumpe, jo so isch är haut
Är isch scho fascht verfrore! Jetz wirds klar, es isch der Gsöu!
Dä arm Cheib gwöhnt sich jetzt scho dra, dass me dinn nümm rouche söu!
Amne Geburtstag seit dr Studer Hänsu zumne öutere Gascht
Ig cha di niene hii due, aber sicher bini fascht
Bisch du nid vo Gunzge? I weiss nid dorum froog i
Fröit mi, darfi vorstöue, ig heisse Adolf Ogi.
Genauigkeit isch öppis, wo öis Schwizer duet beschriibe
Scho ir RS lehrsch, wie du chasch ziele mitts uf d'Schiibe
Und als chliine Bueb, do lehrt me mitts id Schössle seiche
Mir verstöi drum nid, wie d'Nati bim Penalti nid cha breiche.
D'Chappeler Fahne hangt verchehrt, d'Soledurner quer
Nur d'Schwiizerfahne hanget richtig, das isch ou nid schwer
Wär macht so öppis - um himmuswöue - passet uf jetz chunnts de
Öise nöie Schueabwart! Dä chunnt halt vo Gunzge.
Wenn erfolgrich wotsch go jage, muesch ganz ruehig chönne sitze
Schwiige stundelang und ou bi Gfohr nid afo schwiitze
D'Verwaltigsrööt for Swissair müesse Superjäger sii
Jetz isch klar, was die verstande hei unter Hunter-Strategie!
Der Polo seit: ig suufe nümm, mach Wärbig für Rivella
Denne wird ig wieder gsund, de gohts mir wieder bella
Am liebschte han ig s'grüene, mit de Chrütli din
Das isch fascht wie ne Joint, das fahrt sofort i Gring
Doch bisch mol uf em Aff, Polo, de roote mir im Fall
Probiers doch unter Umständ ou mit Rivella blau
Wenns dir aber ganz mies goht, denn nimm Rivella rot
Nämlech bi Potänzproblem, wenn är dir nümme stoht.
Im Wald luegt öis en Igu ziemli grimmig aa
Churz drufab es Murmeltier schiint schlächti Luune z'ha
Kei Wunder si d'Tier hässig, das isch nit zum lache
Wenn wäg däm Wätter nid emol e Winterschloof chasch mache.
Der Strossestrich isch gschlosse sit langem scho in Olte
Derfür gits i der Windrose e Shop für die Versoute
D'Erotik, die chunnt nöcher, es wird ou immer schlimmer
Siit nöischtem gits bim Frohsinn es rots Stundehotelzimmer.
Ob Meier oder Käller, Hueber - Hotz oder Lack - Steime
Der Nachname vo Frou und Maa, wie d'Chend heisse, weiss keine
Das spöut ou gar kei Rolle, wichtig isch du duesch dra dänke,
und be Theres Mühlebach, Costa mit Bindestrich aahänke.
Bonjour! Grüezi mitenand, je suis très bien mächtig
Je parle alli Sproche, ça c'est bon, das isch jo prächtig
Regardez - moi, i ha zwar chli e wüeschte Stei
Aber ich bi d'Bundespräsidentin Calmy-Rey.
I luege nid, i schmöcke nüt, bi stöu ond due nüt ghöre
Denn es interessiert mi nid, es duet mi höchstens störe
I mische mi nid ii, das goht mer am Arsch verbi
Wenn der Fessler ond der Gsöu mitnand am stürme si.
Mir chöis nid verbärge – s'Schneewittli isch dervo
Si isch mit öis potänte Zwärge nümme noche cho
Mir Zwärge halte zäme und das isch wörklech cool
Drum bisse mer i suuri Öpfu und si jetz halt chli schwul.
Sit s'Schneewittli wäg isch, döi mir d'Neigige usloote
Zum Glück chasch jetze ändlech au aus schwule Zwärg hüroote.
