Play
Lied Soiborschte 2005
Lied Fasnacht 2005
Melodie: Das alte Haus von Rocki-Tocki
S'Färnseh het e Sändig gmacht, döu hei grännet, döu hei glacht,
wie zu Gotthälf's Zyte, si si umgloffe Tag und Nacht.
Si hei g'houzet, si hei g'füüret si hei kochet ohni Schtrom,
und der Chnächt dä arm, het gschaffet ohni Lohn.
Das alte Huus vom Saleweidli, isch nöi zu Ehre cho.
Si hei vor Chöuti zitteret, e Sou het s'Läbe gloh.
Jo das Huus esch alt und hässlech und d'Mure si scho grau,
und s'isch ou nid in Rocki-Tocki, nei im Ämmitau!
ÖiseWärchhof, isch en alti Hütte und scho zimli grau,
und es ganz es chlises Zimmerli, isch öises Zunftlokal.
Mir hei würklech fasch kei Platz, Ornig ha esch schampar schwär
und denn bruucht's no ab und zue mou s'Militär.
Gäbet doch die alti Hütte, i öis als Zunftlokal,
der erschti Schtock würd länge, das wäri ideal.
Ou de chönnte mir dört schalte ond walte, jo das wär's
Und s'nöchscht Johr gäb's de ganz e liebe Värs!
S'alte Gmeinshuus set me renoviere, het der Gmeindrot gseit
ou für Jugendarbeit öppis z'zahle, sig me ned bereit!
Gar keis Schtaatsmännisch's Verhalte sig das, hei mir denn vernoh
und das het der Ritter-Viktor usegloo!
Das alte Gmeindshuus do vo Chappu, das isch jo zemli grau.
E nöii Gmeindsverwaltig boue wäri scho no schlau.
Das alte Gmeindshuus do vo Chappu, isch zwar nümm deckt mit Schroh,
doch wenn der Marcel umelouft, den zitteret's eso.
Play
Der Roger Nick
Der Roger Nick chunnt schpot mou hei,
und cha ned ine – ei ei ei!
Er dänkt;"E bi jo ned so doof
Und wecke d'Chend ned us em Schloof!"
Er chlätteret uf d'Veranda ue,
doch d'Türe die esch leider zue,
er pöpperlet as s'Feischter dört,
i gloube d'Erika het's ghört.
Der Wind bloost dur n'es nüt a Chleider,
risst ire d'Türe us de Finger – leider.
E Pflanzechöbu g'heit grad um,
uf e Chenderwaage, das esch dumm.
Dä fahrt krachend jetz as Gländer,
denn retur ane CD-Ständer.
Der CD-Ständer gheit met Krach
Und ändlech si ou d'Buebe wach!
Play
Si die z'Amerika
Si die z'Amerika würklech aacho,
wo Chappu vor hunderfüfzg Johr hei verloo?
Werum het vor hundert Johr s'haube Dorf brönnt?
Froge wo niemer en Antwort könnt.
Eis hei mer, dasch unbeschtritte,
es Gmeindshuus wie zu Gotthelfs-Zite!
Play
Pflotscher döi nie im Chrüz ufträte
Pflotscher döi nie im Chrüz ufträte,
ou wenn mer das öppe mou gärn e so hätte.
S'Röösli duet auen Ärnschtens abwäge,
es "Pflotscherverbot" ou uf der Schtääge.
Werum das so isch, mer wüsses nid gnau,
aber s'Rösli ärgeret sech grüen und blau.
Play
E Heimwärcher saggt
E Heimwärcher saggt, schrubt und montiert,
der Dani Bär het's mit ere Chuchi probiert.
Är chouft en Ofe mit Hitz und mit Dampf,
das cheibe Aschliesse isch no e Chrampf.
Wo n'är mit de Füess im Wasser duet schtoh
muess är gliich no e Fachmaa lo cho!
Play
Met öiser Regierig
"Met öiser Regierig," het eine gschtönt,
"si mer do z'Chappu jo gar net verwöhnt.
Si aui glich schtarch und glich schwach, sappermänt,
öb schwarz, rot, gääl oder transparänt."
D'EUK seit, was mer chönnte probiere,
die Altglasfläsche nach Farbe sortiere.
Play
Der Düggeli Peter, der Veterinär
Der Düggeli Peter, der Veterinär,
het's ned immer liecht, jo s'Lääbe esch schwär.
Er duet a der Gränze Fleisch kontrolliere
und duet wenn's chli schtinkt, das Züüg zruggschpediere.
Er würdi ou z'Oute e Fleischtschopp finde,
denn dört set der Schtrosseschtrich ändlech verschwinde.
Play
Met 0,5 Promill besch vou!
Met 0,5 Promill besch vou!
Das weiss der Gsöu und der Dinu ou,
drum döi si bem Outofahre schtreike.
Der Gsöu goht z'Fuess, der Dinu duet Beike.
Wüsst der, was öisi Scheffe no dörfte drinke?
Drei Tag nüt, denn duet der Pegu under 0,5 sinke.
Play
Hesch ghört vo der Ukraine vo de Wahle?
Hesch ghört vo der Ukraine vo de Wahle?
Mer Chappeler müesse do gar ned prahle.
Wenn mou a ne Gmeindsversammlig gosch,
gits bi Abschtimmige und Wahle, es huere Gnosch.
D'Hägedörfer und Boniger hei lo dureblicke,
si wöue Wahlbeobachter schicke!
Play
E Drink-Halle heig's im Born obe geh
E Drink-Halle heig's im Born obe geh,
so het mes vom Wyss Werner chönne verneh.
Sithär duet öis ei Gedanke blooge,
hüt het's es Huus für Ornitologe,
denn wäri auso ou beleit,
dene hesch früecher Drinker gseit.
Play
Sit föifezwänzg Johr e frächi Röhre
Sit föifezwänzg Johr e frächi Röhre.
Döu amüsierts, die andere duet's schtöre.
Am Nöijohrsapero, wärde mer für das geehrt,
d'Wäut esch haut mängisch es bitzli verchert.
Eigentlech sette vor Fröid mer jetz schtraale,
aber mer hei's scho tschegget, das Johr si Wahle!
Play
D'Schwyzer und d'EU
D'Schwyzer und d'EU, das isch doch fasch gliich,
wie d'Gallier früecher im römische Riich.
Mer kämpfe verzwiflet, uf verlornem Poschte,
gäge bösi Mächt us Weschte und Oschte.
Mer wehre n'is tapfer, den Galliern sei dank,
nur fählt öis e Druide mit em Zoubertrank.
